De femason a batesons :

aquò d'En Fontòrba a Podís, e aquò d'En Thuriès a Dupuy (seccion de Cofinal, Revel, 31).

   A Dupuy dins las annadas 1950, Elia Thuriès e Enriqueta Gantier cargan de fems per preparar las tèrras. Lo moscal parava de las moscas.
 Aprèp, caliá laurar. Aicí, son de vesins de nòstra familha Fontòrba-Roquet-Martin a La Bordassa (Podís). Caliá dos parelhs de buòus per tirar la mossa brabant.  
   Aquèla fòtò, prèsa a Dupuy alentorn de 1942, pòt servir de representacion de la curbida. Es estada enviada a n' Albert Baptista Fontòrba (fraire de Noelia), qu'èra presonièr de guèrra al Stalag VIIA. De dreita a l'esquèrra : Noelia Fontòrba e son marit Elia Thuriès, un vesin Pelissier, e Ivòna Thuriès.
 Directament a las segas, a Podís alentorn de 1945. Lo blat èra segat quant èra pas complètament madur, per que lo gran tombesse pas avans d'esser batut. La meissonaira-ligaira èra tirada per dos parelhs de buòus e una cavala. Sus la machina, Elia Thuriès (paire de mon pairin), Joana-Angelina Roquet-Fontòrba (mairina de mon pairin) ten l'agulhada, a dreita, amb una garba suls genolhs, Martina Maria Martin-Roquet (a 88 o 89 ans; la maire de Joana-Angelina Roquet-Fontòrba), e ambe lo capèl, la filha d'Elia Thuriès, Ivòna Thuriès.  
   Totjorn a Podís, la realisacion del palhièr. Las garbas èran adobadas per que l'aiga, se ploviá, corrèsse a la surfaça e pissèsse en defòra de la piala. A n'aquèla epòca, òm se trufava de la securitat : los òmes an una cigaretta als pòts...
 A Dupuy, lo matin del 10/08/1963, tot es prest per batason. Las palhas an acabat de s'amadurar en piala, lo gran se podrà destacar. Los garbièrs son encara coberts d'una tèla. La nautor de l'òrma al rèire plan e l'escala balhan idèia de la dimension d'an aqueles garbièrs!  
   Amb un 'monta-garba', las garbas son menadas sul la machina, ont son desligadas avans d'alimentar la batedoira.
  A la sortida, una prèssa de balas, e una escala per las recatar.  
   Tot aquel afar demandava bravament de monde. Lo travalh es dejà plan avançat, lo segond garbièr es entemenat. A la sortida del ventilator, lo faiç d'àbets creiç.
 A n'aquel moment, lo darrièr garbièr n'a pas mai que lo tèrç de sa nautor. Al pè de la machina, lo gran es ensacat. Davant la caissa, òm vei dos doble decalitres per las mesuras.  
   Resumit de las operacions : lo garbièr, la batedoira, la prèssa. Al rèire plan, los àbets (en clar) son tant nauts que la prèssa.

Fòtòs colleccion Laurenç JM Thuriès, copyright © 2001-2010.